aaina rakhte to apni kaj-adai dekhte

aa.ina rakhte to apnī kaj-adā.ī dekhte

kaash tum bhī ḳhud meñ thoḌī sī burā.ī dekhte

bujh ga.ī hai aañkh ab manzar meñ kuchh rakkhā nahīñ

varna ham bhī ḳhvāb kī jalva-numā.ī dekhte

thak ga.e haiñ lafz ab ḳhāmosh rahnā hī bhalā

ab bhalā kyā harf-o-mā'nī kī laḌā.ī dekhte

paḌh liyā hotā agar tum ne hamāre zaḳhm ko

ham meñ ik ujḌī huī puurī ḳhudā.ī dekhte

ḳhud se ham bāhar nikal paa.e nahīñ 'umr-e-tamām

tujh tak ai duniyā kahāñ apnī rasā.ī dekhte

rah ga.e miT kar ham apnī bebasī ke moḌ par

phir kahāñ se 'ishq kī ham pārsā.ī dekhte

jis jagah ham ne gañvā.ī apnī 'umr-e-be-samar

kaash tum bhī vo jagah vo bevafā.ī dekhte

ek muddat se ta'alluq sirf majbūrī rahā

tum kabhī to 'ishq meñ vo āshnā.ī dekhte

ḳhuun thūkā hai to jā kar ye ġhazal paidā huī

kaash tum bhī lafz kī ye ḳhuuñ chukā.ī dekhte

ḳhatm hai ab ye tamāsha ḳhaak Daalo ham pe bhī

kab talak 'sāhil' tum apnī jag-hañsā.ī dekhte

aaina rakhte to apni kaj-adai dekhte

kash tum bhi KHud mein thoDi si burai dekhte

bujh gai hai aankh ab manzar mein kuchh rakkha nahin

warna hum bhi KHwab ki jalwa-numai dekhte

thak gae hain lafz ab KHamosh rahna hi bhala

ab bhala kya harf-o-ma'ni ki laDai dekhte

paDh liya hota agar tum ne hamare zaKHm ko

hum mein ek ujDi hui puri KHudai dekhte

KHud se hum bahar nikal pae nahin 'umr-e-tamam

tujh tak ai duniya kahan apni rasai dekhte

rah gae miT kar hum apni bebasi ke moD par

phir kahan se 'ishq ki hum parsai dekhte

jis jagah hum ne ganwai apni 'umr-e-be-samar

kash tum bhi wo jagah wo bewafai dekhte

ek muddat se ta'alluq sirf majburi raha

tum kabhi to 'ishq mein wo aashnai dekhte

KHun thuka hai to ja kar ye ghazal paida hui

kash tum bhi lafz ki ye KHun chukai dekhte

KHatm hai ab ye tamasha KHak Dalo hum pe bhi

kab talak 'sahil' tum apni jag-hansai dekhte