dar dar ki bhi na Thokar khao mauqa hai

dar dar kī bhī na Thokar khaao mauqa' hai

ḳhud apnī pahchān banāo mauqa' hai

zaḳhmoñ kī gunjā.ish rakkhī hai maiñ ne

tum bhī apnā tiir chalāo mauqa' hai

yā to mere haath pe apnā haath rakho

yā duniyā se haath milāo mauqa' hai

maiñ tūfān meñ kashtī le kar utrā huuñ

tum chāho to jaan chuḌāo mauqa' hai

saath na chhūTe aapas kī takrāroñ meñ

hāthoñ ko zanjīr banāo mauqa' hai

aa jā.egā naam shahīdoñ meñ apnā

is miTTī par jaan luTāo mauqa' hai

aaj 'adālat aur ye munsif tere haiñ

jo chāho ilzām lagāo mauqa' hai

terī havelī merā chhappar TuuT gayā

TuuT na jaa.e desh bachāo mauqa' hai

kal ye tum ko ḳhuun rulā.egī 'ġhāfil'

āñgan kī dīvār girāo mauqa' hai

dar dar ki bhi na Thokar khao mauqa' hai

KHud apni pahchan banao mauqa' hai

zaKHmon ki gunjaish rakkhi hai main ne

tum bhi apna tir chalao mauqa' hai

ya to mere hath pe apna hath rakho

ya duniya se hath milao mauqa' hai

main tufan mein kashti le kar utra hun

tum chaho to jaan chuDao mauqa' hai

sath na chhuTe aapas ki takraron mein

hathon ko zanjir banao mauqa' hai

aa jaega nam shahidon mein apna

is miTTi par jaan luTao mauqa' hai

aaj 'adalat aur ye munsif tere hain

jo chaho ilzam lagao mauqa' hai

teri haweli mera chhappar TuT gaya

TuT na jae desh bachao mauqa' hai

kal ye tum ko KHun rulaegi 'ghafil'

aangan ki diwar girao mauqa' hai