kya mile wasif ki masti ka suragh

kyā mile 'vāsif' kī mastī kā surāġh

chashm-e-sāqī ne kiyā raushan charāġh

har qadam par ik na.ī manzil milī

gul khile haiñ yā hamāre dil ke daaġh

ḳhud huā hai jalva-gar husn-e-azal

hai junūñ kī saltanat 'ājiz dimāġh

mastī-e-rindāñ se jhuum uTThī zamīñ

āsmāñ hai sar-nigūñ jaise ayāġh

dil meñ āñkheñ haiñ to hai āñkhoñ meñ dil

baaġh meñ haiñ phuul aur phūloñ meñ baaġh

kya mile 'wasif' ki masti ka suragh

chashm-e-saqi ne kiya raushan charagh

har qadam par ek nai manzil mili

gul khile hain ya hamare dil ke dagh

KHud hua hai jalwa-gar husn-e-azal

hai junun ki saltanat 'ajiz dimagh

masti-e-rindan se jhum uTThi zamin

aasman hai sar-nigun jaise ayagh

dil mein aankhen hain to hai aankhon mein dil

bagh mein hain phul aur phulon mein bagh