idhar charagh jal gae udhar charagh jal gae

idhar charāġh jal ga.e udhar charāġh jal ga.e

jidhar jidhar uThī tirī nazar charāġh jal ga.e

ye aur baat raat bhar kā tai na kar sake safar

magar ye kam nahīñ ki vaqt par charāġh jal ga.e

havā kā aisā zor thā ki ik balā kā shor thā

isī fazā meñ jo the bā-hunar charāġh jal ga.e

hai baat yuuñ to raat kī magar na ehtiyāt kī

to kyā karoge daf.atan agar charāġh jal ga.e

jo saath sub.h se chale vo saare log din Dhale

usī taraf ko ho liye jidhar charāġh jal ga.e

vo tīrgī kā jaal thā ki ab safar muhāl thā

huā ye tere naam kā asar charāġh jal ga.e

idhar charagh jal gae udhar charagh jal gae

jidhar jidhar uThi teri nazar charagh jal gae

ye aur baat raat bhar ka tai na kar sake safar

magar ye kam nahin ki waqt par charagh jal gae

hawa ka aisa zor tha ki ek bala ka shor tha

isi faza mein jo the ba-hunar charagh jal gae

hai baat yun to raat ki magar na ehtiyat ki

to kya karoge dafatan agar charagh jal gae

jo sath subh se chale wo sare log din Dhale

usi taraf ko ho liye jidhar charagh jal gae

wo tirgi ka jal tha ki ab safar muhaal tha

hua ye tere nam ka asar charagh jal gae