chalo farar-e-KHudi ka koi sila to mila

chalo farār-e-ḳhudī kā koī sila to milā

hamīñ mile nahīñ us ko hameñ ḳhudā to milā

nashāt-e-qarya-e-jāñ se judā huī ḳhushbū

safar kuchh aisā hai ab ke koī milā to milā

hamāre baa'd rivāyat chalī mohabbat kī

nizām-e-ālam-e-hastī ko falsafa to milā

jo chhoḌ aa.e the taskīn-e-dil ke vāste ham

tumheñ ai jān-e-tamannā vo naqsh-e-pā to milā

savāl aa ga.e āñkhoñ se chhan ke hoñToñ par

hameñ javāb na dene kā fā.eda to milā

ye āh-o-girya-o-zārī kahīñ to kaam aa.ī

havā-e-dasht ko paanī kā zā.iqa to milā

namāz-e-asr nahīñ paḌh sakī mirī vahshat

junūn-e-ishq ko maidān-e-karbalā to milā

phir is ke baa'd barāmad na ho sakā kuchh bhī

hamāre aañkh meñ jaltā huā diyā to milā

chalo farar-e-KHudi ka koi sila to mila

hamin mile nahin us ko hamein KHuda to mila

nashat-e-qarya-e-jaan se juda hui KHushbu

safar kuchh aisa hai ab ke koi mila to mila

hamare ba'd riwayat chali mohabbat ki

nizam-e-alam-e-hasti ko falsafa to mila

jo chhoD aae the taskin-e-dil ke waste hum

tumhein ai jaan-e-tamanna wo naqsh-e-pa to mila

sawal aa gae aankhon se chhan ke honTon par

hamein jawab na dene ka faeda to mila

ye aah-o-girya-o-zari kahin to kaam aai

hawa-e-dasht ko pani ka zaiqa to mila

namaz-e-asr nahin paDh saki meri wahshat

junun-e-ishq ko maidan-e-karbala to mila

phir is ke ba'd baramad na ho saka kuchh bhi

hamare aankh mein jalta hua diya to mila