chale maqtal ki jaanib aur chhati khol di humne

chale maqtal kī jānib aur chhātī khol dī ham ne

baḌhāne par patañg aa.e to charḳhī khol dī ham ne

paḌā rahne do apne boriye par ham faqīroñ ko

phaTī rah jā.eñgī āñkheñ jo muTThī khol dī ham ne

kahāñ tak bojh baisākhī kā saarī zindagī Dhote

utarte hī kuñ.eñ meñ aaj rassī khol dī ham ne

farishto tum kahāñ tak nāma-e-a.amāl dekhoge

chalo ye nekiyāñ gin lo ki gaThrī khol dī ham ne

tumhārā naam aayā aur ham takne lage rasta

tumhārī yaad aa.ī aur khiḌkī khol dī ham ne

purāne ho chale the zaḳhm saare ārzūoñ ke

kaho chāragaroñ se aaj paTTī khol dī ham ne

tumhāre dukh uThā.e is liye phirte haiñ muddat se

tumhāre naam aa.ī thī jo chiTThī khol dī ham ne

chale maqtal ki jaanib aur chhati khol di hum ne

baDhane par patang aae to charKHi khol di hum ne

paDa rahne do apne boriye par hum faqiron ko

phaTi rah jaengi aankhen jo muTThi khol di hum ne

kahan tak bojh baisakhi ka sari zindagi Dhote

utarte hi kunen mein aaj rassi khol di hum ne

farishto tum kahan tak nama-e-amal dekhoge

chalo ye nekiyan gin lo ki gaThri khol di hum ne

tumhaara nam aaya aur hum takne lage rasta

tumhaari yaad aai aur khiDki khol di hum ne

purane ho chale the zaKHm sare aarzuon ke

kaho chaaragaron se aaj paTTi khol di hum ne

tumhaare dukh uThae is liye phirte hain muddat se

tumhaare nam aai thi jo chiTThi khol di hum ne