kya jaane kis ki dhun mein raha dil-figar chand

kyā jaane kis kī dhun meñ rahā dil-figār chāñd

sañgam pe roz-o-shab ke Dhalā baar baar chāñd

aa.ī na raat bhar koī panghaT pe sāñvlī

paanī meñ chhup ke baiThā rahā be-qarār chāñd

kirnoñ kī Doriyoñ se ulajhte ho kis liye

kuchh bhī na de sakegā tujhe dāġh-dār chāñd

baazū ke dā.ere vo mahak chūḌiyāñ khanak

do-sā.e zard-chāñdnī dhīmī pukār chāñd

sūraj thā vo to shaam se pahle hī Dhal gayā

niile ufuq pe aur bhī haiñ be-shumār chāñd

har roz mere ghar meñ utartā hai kis liye

mujh ko bhī apne shahr meñ ik din utaar chāñd

bastī ke log jāniye kyā sochte rahe

bādal kī chhat pe soyā rahā sogvār chāñd

ab chāñdnī ke naam se nafrat sī ho ga.ī

'ikrām' zindagī ko lage aise chaar chāñd

kya jaane kis ki dhun mein raha dil-figar chand

sangam pe roz-o-shab ke Dhala bar bar chand

aai na raat bhar koi panghaT pe sanwli

pani mein chhup ke baiTha raha be-qarar chand

kirnon ki Doriyon se ulajhte ho kis liye

kuchh bhi na de sakega tujhe dagh-dar chand

bazu ke daere wo mahak chuDiyan khanak

do-sae zard-chandni dhimi pukar chand

suraj tha wo to sham se pahle hi Dhal gaya

nile ufuq pe aur bhi hain be-shumar chand

har roz mere ghar mein utarta hai kis liye

mujh ko bhi apne shahr mein ek din utar chand

basti ke log jaaniye kya sochte rahe

baadal ki chhat pe soya raha sogwar chand

ab chandni ke nam se nafrat si ho gai

'ikram' zindagi ko lage aise chaar chand