ye koi rasm hai kuchh aise wadon ka Thikana hai

ye koī rasm hai kuchh aise vā'doñ kā Thikānā hai

faqat bāteñ hī bāteñ haiñ na aanā hai na jaanā hai

ye kyā kahte ho tum se rasm karnā zak uThānā hai

nasīb-e-dushmanāñ tum ne mujhe kyā ġhair jaanā hai

hazāroñ minnatoñ par aaj kahte haiñ ki ā.eñge

zarā sī baat thī jis ko baḌī mushkil se maanā hai

abhī ye kis ne dekhā hai taras khā.eñ ki nā-kHush hoñ

abhī to un se mil kar un ko hāl-e-dil sunānā hai

mujhe ye fikr vo baiTheñ to hāl-e-dil kahūñ un se

unheñ ye zid phir ā.ūñgā mujhe is vaqt jaanā hai

ye taskīñ de ke mujh ko vo ga.e dushman kī mahfil meñ

ki is mahfil se uTh kar phir tumhāre ghar bhī aanā hai

ye sach hai un se baḌh kar dil ne kī hai dushmanī mujh se

'qamar' maiñ jhuuT kyuuñ bolūñ ḳhudā ko muñh dikhānā hai

ye koi rasm hai kuchh aise wa'don ka Thikana hai

faqat baaten hi baaten hain na aana hai na jaana hai

ye kya kahte ho tum se rasm karna zak uThana hai

nasib-e-dushmanan tum ne mujhe kya ghair jaana hai

hazaron minnaton par aaj kahte hain ki aaenge

zara si baat thi jis ko baDi mushkil se mana hai

abhi ye kis ne dekha hai taras khaen ki na-kHush hon

abhi to un se mil kar un ko haal-e-dil sunana hai

mujhe ye fikr wo baiThen to haal-e-dil kahun un se

unhen ye zid phir aaunga mujhe is waqt jaana hai

ye taskin de ke mujh ko wo gae dushman ki mahfil mein

ki is mahfil se uTh kar phir tumhaare ghar bhi aana hai

ye sach hai un se baDh kar dil ne ki hai dushmani mujh se

'qamar' main jhuT kyun bolun KHuda ko munh dikhana hai