ye kashish to nahin yunhi taswir mein
ye kashish to nahīñ yūñhī tasvīr meñ
koī jaadū hai abrū kī shamshīr meñ
ḳhvāb to dekhā hai maiñ ne kaafī hasīñ
bas ḳharābī na ho is kī tā'bīr meñ
koī pūchhe mirā us se kahnā yahī
tere zindāñ meñ haiñ terī zanjīr meñ
likhtā huuñ jab kabhī be-vafā.ī tirī
ye qalam ḳhud hī likhtā hai tafsīr meñ
us kī qudrat se hai ye zamīñ āsmāñ
us kī qudrat dikhī mujh ko qitmīr meñ
maiñ ne maanā ki ḳhat meñ to royā nahīñ
lafz bhīge haiñ kyuuñ terī tahrīr meñ
mujh ko 'irdum' kaho yā to majnūñ kaho
kyūñki lailā nahīñ merī taqdīr meñ
ye kashish to nahin yunhi taswir mein
koi jadu hai abru ki shamshir mein
KHwab to dekha hai main ne kafi hasin
bas KHarabi na ho is ki ta'bir mein
koi puchhe mera us se kahna yahi
tere zindan mein hain teri zanjir mein
likhta hun jab kabhi be-wafai teri
ye qalam KHud hi likhta hai tafsir mein
us ki qudrat se hai ye zamin aasman
us ki qudrat dikhi mujh ko qitmir mein
main ne mana ki KHat mein to roya nahin
lafz bhige hain kyun teri tahrir mein
mujh ko 'irdum' kaho ya to majnun kaho
kyunki laila nahin meri taqdir mein
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
