saya-e-zulf mein ab dil ke Thikane bhi nahin

sāya-e-zulf meñ ab dil ke Thikāne bhī nahīñ

saḳht daur aa.e magar aise zamāne bhī nahīñ

vo 'ajab shoḳh-tabī’at hai 'ajab sho'la-mizāj

chāhe bhī sharh-e-vafā phir use maane bhī nahīñ

ek dhokā hai faqat us kī rafāqat kyā hai

jo mire dil meñ rahe aur mujhe jaane bhī nahīñ

dīda-o-dil meñ hai tū dīda-o-dil se rū-posh

tujh se āgāh tire ā.ina-ḳhāne bhī nahīñ

tū hī batlā ye bhareñ bhī to bhalā kaise bhareñ

tanz ke zaḳhm haiñ aur zaḳhm purāne bhī nahīñ

mo'tabar ho ga.e ik harf-e-vafā keh ke hī log

yahī maiñ keh duuñ to shāyad koī maane bhī nahīñ

us kā andāz-e-mulāqāt hī ab hai kuchh aur

'ahd-o-paimān to kyā hīle-bahāne bhī nahīñ

kis tarah baat ho us jān-e-ġhazal se 'iqbāl'

ab to juz nazr-e-ġhazal aur bahāne bhī nahīñ

saya-e-zulf mein ab dil ke Thikane bhi nahin

saKHt daur aae magar aise zamane bhi nahin

wo 'ajab shoKH-tabi’at hai 'ajab sho'la-mizaj

chahe bhi sharh-e-wafa phir use mane bhi nahin

ek dhoka hai faqat us ki rafaqat kya hai

jo mere dil mein rahe aur mujhe jaane bhi nahin

dida-o-dil mein hai tu dida-o-dil se ru-posh

tujh se aagah tere aaina-KHane bhi nahin

tu hi batla ye bharen bhi to bhala kaise bharen

tanz ke zaKHm hain aur zaKHm purane bhi nahin

mo'tabar ho gae ek harf-e-wafa keh ke hi log

yahi main keh dun to shayad koi mane bhi nahin

us ka andaz-e-mulaqat hi ab hai kuchh aur

'ahd-o-paiman to kya hile-bahane bhi nahin

kis tarah baat ho us jaan-e-ghazal se 'iqbaal'

ab to juz nazr-e-ghazal aur bahane bhi nahin