na uske hath ko thama na lab-kushai ki

na us ke haath ko thāmā na lab-kushā.ī kī

koī bhī rasm adā kī nahīñ judā.ī kī

jo keh rahā thā zarā bach ke sab munāfiq haiñ

usī ne piiTh ke pīchhe mirī burā.ī kī

ham apnī qaid meñ us ko kahāñ talak rakhte

jise ḳhushī thī bahut 'ishq se rihā.ī kī

mirā vujūd bhī banjar zamīn jaisā thā

so āñsuoñ ne mire zaḳhm kī tarā.ī kī

bharosa de diyā badle meñ ek dūsre ko

'ajīb rasm hamārī thī muñh dikhā.ī kī

tirī nazar meñ bure sirf ham sahī lekin

hamāre saath bhalā tum ne kyā bhalā.ī kī

jahāñ pe haath chhuḌāyā thā tum ne 'faisal' se

vahīñ pe chūḌiyāñ TūTīñ tirī kalā.ī kī

na us ke hath ko thama na lab-kushai ki

koi bhi rasm ada ki nahin judai ki

jo keh raha tha zara bach ke sab munafiq hain

usi ne piTh ke pichhe meri burai ki

hum apni qaid mein us ko kahan talak rakhte

jise KHushi thi bahut 'ishq se rihai ki

mera wujud bhi banjar zamin jaisa tha

so aansuon ne mere zaKHm ki tarai ki

bharosa de diya badle mein ek dusre ko

'ajib rasm hamari thi munh dikhai ki

teri nazar mein bure sirf hum sahi lekin

hamare sath bhala tum ne kya bhalai ki

jahan pe hath chhuDaya tha tum ne 'faisal' se

wahin pe chuDiyan TuTin teri kalai ki