mohabbat kar ke ab humse kinara kis liye jaanan

mohabbat kar ke ab ham se kināra kis liye jānāñ

ye ham se duur jaane kā ishāra kis liye jānāñ

mohabbat tum se kī maiñ ne hazāroñ kī sunī bāteñ

batā tū hī ki maiñ huuñ be-sahārā kis liye jānāñ

na tū vāqif vafāoñ ke taqāzoñ se thā gar jānāñ

mujhe chāhat ke shīshe meñ utārā kis liye jānāñ

hamesha saath rahne kī jo tū ne khaa.ī thiiñ qasmeñ

vafā kā tū ne badla hai ye dhārā kis liye jānāñ

agar tum ne na aanā thā phir itnā to batā dete

isī ik aas par ghar ko sañvārā kis liye jānāñ

yahī bas ḳhauf thā rusvā na ho jaa.e kahīñ jag meñ

ye baazī kab kahāñ kaise maiñ haarā kis liye jānāñ

mohabbat jab thī do-tarfa to kaisā ḳhauf ab 'qaisar'

ab is dasht-e-mohabbat meñ ḳhasāra kis liye jānāñ

mohabbat kar ke ab hum se kinara kis liye jaanan

ye hum se dur jaane ka ishaara kis liye jaanan

mohabbat tum se ki main ne hazaron ki suni baaten

bata tu hi ki main hun be-sahaara kis liye jaanan

na tu waqif wafaon ke taqazon se tha gar jaanan

mujhe chahat ke shishe mein utara kis liye jaanan

hamesha sath rahne ki jo tu ne khai thin qasmen

wafa ka tu ne badla hai ye dhaara kis liye jaanan

agar tum ne na aana tha phir itna to bata dete

isi ek aas par ghar ko sanwara kis liye jaanan

yahi bas KHauf tha ruswa na ho jae kahin jag mein

ye bazi kab kahan kaise main haara kis liye jaanan

mohabbat jab thi do-tarfa to kaisa KHauf ab 'qaisar'

ab is dasht-e-mohabbat mein KHasara kis liye jaanan