mata-e-ghairat-o-paiman luTa ke baiThe hain

matā'-e-ġhairat-o-paimāñ luTā ke baiThe haiñ

jo ham-rikāb the raste bhulā ke baiThe haiñ

unheñ shaguftagī-e-gulsitāñ se kyā nisbat

jo shāḳh-e-zard pe maskan banā ke baiThe haiñ

miTā ke sāñjhe dukhoñ kī har ik rivāyat ko

vo apne apne qabīle bachā ke baiThe haiñ

'ajab ye rasm-e-masīhā.ī hai ki chāra-gar

ġhanīm-e-vaqt se qīmat lagā ke baiThe haiñ

jo mo'tabar the bahut bazm-e-jāñ-nisārāñ meñ

vo aaj ġhair kī mahfil sajā ke baiThe haiñ

qabā-e-zar kī tamannā meñ bech dī ġhairat

vaqār-e-harf-e-sadāqat gañvā ke baiThe haiñ

ḳharīd laa.e haiñ 'saulat' jo zulmat-e-paiham

charāġh-e-mehr-e-munavvar bujhā ke baiThe haiñ

mata'-e-ghairat-o-paiman luTa ke baiThe hain

jo ham-rikab the raste bhula ke baiThe hain

unhen shaguftagi-e-gulsitan se kya nisbat

jo shaKH-e-zard pe maskan bana ke baiThe hain

miTa ke sanjhe dukhon ki har ek riwayat ko

wo apne apne qabile bacha ke baiThe hain

'ajab ye rasm-e-masihai hai ki chaara-gar

ghanim-e-waqt se qimat laga ke baiThe hain

jo mo'tabar the bahut bazm-e-jaan-nisaran mein

wo aaj ghair ki mahfil saja ke baiThe hain

qaba-e-zar ki tamanna mein bech di ghairat

waqar-e-harf-e-sadaqat ganwa ke baiThe hain

KHarid lae hain 'saulat' jo zulmat-e-paiham

charagh-e-mehr-e-munawwar bujha ke baiThe hain