KHudaya ye KHudai kha gai hai

ḳhudāyā ye ḳhudā.ī khā ga.ī hai

mujhe us kī judā.ī khā ga.ī hai

kisī ko sādgī ne maar Daalā

kisī ko ḳhud-numā.ī khā ga.ī hai

kahīñ par jumbish-e-abrū ne luuTā

kahīñ par dil rihā.ī khā ga.ī hai

na pūchho haal apnī bebasī kā

tumhārī be-vafā.ī khā ga.ī hai

hameñ to daad le Duubī yahāñ par

tumheñ to jag-hañsā.ī khā ga.ī hai

mire ghar ke yahāñ dīvār-o-dar ko

tirī sho'la-navā.ī khā ga.ī hai

ḳhudāvandā hidāyat de unheñ bhī

jinheñ harza-sarā.ī khā ga.ī hai

rakhī thī baat dil meñ to bharam thā

jūñ-hī hoñToñ pe laa.ī khā ga.ī hai

huā hai munjamid to dekhiye jī

taqaddus jal kā kaa.ī khā ga.ī hai

yahāñ rishtoñ kī 'qaisar' pāsdārī

mujhe to mere bhaa.ī khā ga.ī hai

KHudaya ye KHudai kha gai hai

mujhe us ki judai kha gai hai

kisi ko sadgi ne mar Dala

kisi ko KHud-numai kha gai hai

kahin par jumbish-e-abru ne luTa

kahin par dil rihai kha gai hai

na puchho haal apni bebasi ka

tumhaari be-wafai kha gai hai

hamein to dad le Dubi yahan par

tumhein to jag-hansai kha gai hai

mere ghar ke yahan diwar-o-dar ko

teri sho'la-nawai kha gai hai

KHudawanda hidayat de unhen bhi

jinhen harza-sarai kha gai hai

rakhi thi baat dil mein to bharam tha

jun-hi honTon pe lai kha gai hai

hua hai munjamid to dekhiye ji

taqaddus jal ka kai kha gai hai

yahan rishton ki 'qaisar' pasdari

mujhe to mere bhai kha gai hai