jis ne apnon ki tarah waqt guzara bhi nahin

jis ne apnoñ kī tarah vaqt guzārā bhī nahīñ

vo tumhārā bhī nahīñ hai vo hamārā bhī nahīñ

rāh-e-ulfat meñ baḌhī be-ruḳhī itnī had se

us ne mujh ko kisī manzil se pukārā bhī nahīñ

ā'lā-zehnī kā har ik zo'm hai be-mā'nī sā

gesū-e-vaqt ko ham ne to sañvārā bhī nahīñ

dard kā kārvāñ baḌhtā hī chalā jaatā hai

koī rahbar bhī nahīñ koī sahārā bhī nahīñ

kaise bulbul ke laboñ par ho ḳhushī kā naġhma

pahle jaisā to bahāroñ kā nazārā bhī nahīñ

ḳhud hī milte haiñ hameñ 'ilm-o-hunar ke gohar

ham ne dāman kahīñ ai dost pasārā bhī nahīñ

kaise 'ātish' kisī nafrat ko jagah deñ dil meñ

mā-sivā pyaar hameñ koī gavārā bhī nahīñ

jis ne apnon ki tarah waqt guzara bhi nahin

wo tumhaara bhi nahin hai wo hamara bhi nahin

rah-e-ulfat mein baDhi be-ruKHi itni had se

us ne mujh ko kisi manzil se pukara bhi nahin

aa'la-zehni ka har ek zo'm hai be-ma'ni sa

gesu-e-waqt ko hum ne to sanwara bhi nahin

dard ka karwan baDhta hi chala jata hai

koi rahbar bhi nahin koi sahaara bhi nahin

kaise bulbul ke labon par ho KHushi ka naghma

pahle jaisa to bahaaron ka nazara bhi nahin

KHud hi milte hain hamein 'ilm-o-hunar ke gohar

hum ne daman kahin ai dost pasara bhi nahin

kaise 'atish' kisi nafrat ko jagah den dil mein

ma-siwa pyar hamein koi gawara bhi nahin