kahin aisa na ho ilzam-e-tauhin-e-bahaar aae

kahīñ aisā na ho ilzām-e-tauhīn-e-bahār aa.e

bahāroñ kā zamāna ham bayābāñ meñ guzār aa.e

jab uTThe sog-vār uThe jab aa.e ashk-bār aa.e

ye kyā kam thā tirī mahfil meñ do lamhe guzār aa.e

chaman meñ rah ke ham nazm-e-chaman yuuñ bhī sañvār aa.e

ki har daur-e-chaman ahl-e-chaman ko sāzgār aa.e

ba-qaid-e-hosh is duniyā meñ dam lenā bhī mushkil thā

magar ham be-ḳhudī-e-shauq meñ kuchh din guzār aa.e

mohabbat zindagī hai zindagī kā naam duniyā hai

mohabbat sāzgār aa.e to duniyā sāzgār aa.e

vafūr-e-be-ḳhudī-e-‘ishq meñ aisā bhī vaqt aayā

vo dil meñ the magar ham duur tak un ko pukār aa.e

havā jab ruḳh badaltī hai to josh aisā bhī hotā hai

kahīñ se kārvāñ guzre kahīñ uḌ kar ġhubār aa.e

kahin aisa na ho ilzam-e-tauhin-e-bahaar aae

bahaaron ka zamana hum bayaban mein guzar aae

jab uTThe sog-war uThe jab aae ashk-bar aae

ye kya kam tha teri mahfil mein do lamhe guzar aae

chaman mein rah ke hum nazm-e-chaman yun bhi sanwar aae

ki har daur-e-chaman ahl-e-chaman ko sazgar aae

ba-qaid-e-hosh is duniya mein dam lena bhi mushkil tha

magar hum be-KHudi-e-shauq mein kuchh din guzar aae

mohabbat zindagi hai zindagi ka nam duniya hai

mohabbat sazgar aae to duniya sazgar aae

wafur-e-be-KHudi-e-‘ishq mein aisa bhi waqt aaya

wo dil mein the magar hum dur tak un ko pukar aae

hawa jab ruKH badalti hai to josh aisa bhi hota hai

kahin se karwan guzre kahin uD kar ghubar aae