bujhte hue charagh jalate chale gae

bujhte hue charāġh jalāte chale ga.e

ham be-ḳhudī meñ ḳhud ko gañvāte chale ga.e

utrā jo dil meñ dard vo gahrā thā is qadar

ham muskurā ke zaḳhm chhupāte chale ga.e

manzil kā kuchh pata na thā lekin junūn meñ

har rāste pe naqsh banāte chale ga.e

tūfān-e-rozgār kī talḳhī ke bā-vajūd

ummīd ke charāġh jalāte chale ga.e

kyā jaane kis nigāh kā tūfān thā ki ham

hosh-o-havās apne gañvāte chale ga.e

har gaam par jo sang-e-malāmat mile hameñ

ham rāste se un ko haTāte chale ga.e

pal bhar ko bhī na ruk sakī āñkhoñ kī ye nadī

dāman meñ apne ashk chhupāte chale ga.e

be-kār jā rahī thī jo mehnat ḳhulūs kī

phir bhī vafā ke farz nibhāte chale ga.e

shā'ir the aur zabt kā dā'vā bhī thā 'asad'

ash'ār meñ vo raaz batāte chale ga.e

bujhte hue charagh jalate chale gae

hum be-KHudi mein KHud ko ganwate chale gae

utra jo dil mein dard wo gahra tha is qadar

hum muskura ke zaKHm chhupate chale gae

manzil ka kuchh pata na tha lekin junun mein

har raste pe naqsh banate chale gae

tufan-e-rozgar ki talKHi ke ba-wajud

ummid ke charagh jalate chale gae

kya jaane kis nigah ka tufan tha ki hum

hosh-o-hawas apne ganwate chale gae

har gam par jo sang-e-malamat mile hamein

hum raste se un ko haTate chale gae

pal bhar ko bhi na ruk saki aankhon ki ye nadi

daman mein apne ashk chhupate chale gae

be-kar ja rahi thi jo mehnat KHulus ki

phir bhi wafa ke farz nibhate chale gae

sha'ir the aur zabt ka da'wa bhi tha 'asad'

ash'ar mein wo raaz batate chale gae