abhi se ai dil-e-nadan ye be-KHudi kya hai

abhī se ai dil-e-nādāñ ye be-ḳhudī kyā hai

abhī to 'ishq kā āġhāz hai abhī kyā hai

mile to kashmakash-e-zīst se mujhe fursat

to phir sukūn se sochūñgā zindagī kyā hai

ba-qadr-e-zarf har ik bāda-ḳhvār hai lekin

ye aur baat hai andāz-e-mai-kashī kyā hai

har ek rasm-e-‘ibādat se be-niyāz huuñ maiñ

vo is liye ki samajhtā huuñ bandagī kyā hai

kabhī na aate yahāñ shaiḳh ham ko samjhāne

agar vo jānte rindoñ kī tishnagī kyā hai

'alāva is ke ki ham ḳhud se be-niyāz raheñ

koī batā.e shu’ūr-e-ḳhud-āgahī kyā hai

shu’ūr-e-fikr-o-nazar ke baġhair ai 'rāhī'

tumhīñ batāo ki me’yār-e-zindagī kyā hai

abhi se ai dil-e-nadan ye be-KHudi kya hai

abhi to 'ishq ka aaghaz hai abhi kya hai

mile to kashmakash-e-zist se mujhe fursat

to phir sukun se sochunga zindagi kya hai

ba-qadr-e-zarf har ek baada-KHwar hai lekin

ye aur baat hai andaz-e-mai-kashi kya hai

har ek rasm-e-‘ibaadat se be-niyaz hun main

wo is liye ki samajhta hun bandagi kya hai

kabhi na aate yahan shaiKH hum ko samjhane

agar wo jaante rindon ki tishnagi kya hai

'alawa is ke ki hum KHud se be-niyaz rahen

koi batae shu’ur-e-KHud-agahi kya hai

shu’ur-e-fikr-o-nazar ke baghair ai 'rahi'

tumhin batao ki me’yar-e-zindagi kya hai