alfaz ki taswir bahut rang bhari hai

alfāz kī tasvīr bahut rang bharī hai

mafhūm ke paikar meñ 'ajab jalva-garī hai

āñkheñ jo khulī haiñ to milā dars-e-haqīqī

nai ḳhvāb kī duniyā hai na vo be-ḳhabarī hai

bech aa.e haiñ kirdār bhī daulat ke 'evaz meñ

is shahr meñ alfāz kī kyā saudā-garī hai

ik 'umr huī aaj bhī guldasta-e-dil ke

sūkhe hue pattoñ kī koī shāḳh harī hai

kaafī hai junūñ hākim-e-daurāñ ke muqābil

kāġhaz hai qalam hai mirī āshufta-sarī hai

raushan bhī nazar aa.e to sūraj kī chamak se

vo chāñd kī bastī jo sitāroñ se bharī hai

TuuTā huā dālān hai dar hai na darīche

mash.hūr magar aaj bhī vo bāra-darī hai

alfaz ki taswir bahut rang bhari hai

mafhum ke paikar mein 'ajab jalwa-gari hai

aankhen jo khuli hain to mila dars-e-haqiqi

nai KHwab ki duniya hai na wo be-KHabari hai

bech aae hain kirdar bhi daulat ke 'ewaz mein

is shahr mein alfaz ki kya sauda-gari hai

ek 'umr hui aaj bhi guldasta-e-dil ke

sukhe hue patton ki koi shaKH hari hai

kafi hai junun hakim-e-dauran ke muqabil

kaghaz hai qalam hai meri aashufta-sari hai

raushan bhi nazar aae to suraj ki chamak se

wo chand ki basti jo sitaron se bhari hai

TuTa hua dalan hai dar hai na dariche

mashhur magar aaj bhi wo bara-dari hai