main faqat chalti rahi manzil ko sar usne kiya

maiñ faqat chaltī rahī manzil ko sar us ne kiyā

saath mere raushnī ban kar safar us ne kiyā

is tarah khīñchī hai mere gird dīvār-e-ḳhabar

saare dushman rauzanoñ ko be-nazar us ne kiyā

mujh meñ baste saare sannāToñ kī lai us se banī

pattharoñ ke darmiyāñ thī naġhma-gar us ne kiyā

be-sar-o-sāmāñ pe dildārī kī chādar Daal dī

be-dar-o-dīvār thī maiñ mujh ko ghar us ne kiyā

pāniyoñ meñ ye bhī paanī ek din tahlīl thā

qatra-e-be-sarfa ko lekin guhar us ne kiyā

ek ma.amūlī sī achchhā.ī tarāshī hai bahut

aur fikr-e-ḳhām se sarf-e-nazar us ne kiyā

phir to imkānāt phūloñ kī tarah khulte ga.e

ek nanhe se shagūfe ko shajar us ne kiyā

taaq meñ rakkhe diye ko pyaar se raushan kiyā

us diye ko phir charāġh-e-rahguzar us ne kiyā

main faqat chalti rahi manzil ko sar us ne kiya

sath mere raushni ban kar safar us ne kiya

is tarah khinchi hai mere gird diwar-e-KHabar

sare dushman rauzanon ko be-nazar us ne kiya

mujh mein baste sare sannaTon ki lai us se bani

pattharon ke darmiyan thi naghma-gar us ne kiya

be-sar-o-saman pe dildari ki chadar Dal di

be-dar-o-diwar thi main mujh ko ghar us ne kiya

paniyon mein ye bhi pani ek din tahlil tha

qatra-e-be-sarfa ko lekin guhar us ne kiya

ek mamuli si achchhai tarashi hai bahut

aur fikr-e-KHam se sarf-e-nazar us ne kiya

phir to imkanat phulon ki tarah khulte gae

ek nanhe se shagufe ko shajar us ne kiya

taq mein rakkhe diye ko pyar se raushan kiya

us diye ko phir charagh-e-rahguzar us ne kiya