mera afsana-e-gham zikr ke qabil nahin hota

mirā afsāna-e-ġham zikr ke qābil nahīñ hotā

taġhāful aap kā is meñ agar shāmil nahīñ hotā

na aa.e ashk palkoñ tak ye achchhā hī huā varna

chalā jaatā bharam bhī aur kuchh hāsil nahīñ hotā

maza tūfāñ se Takrāne kā jo mā'lūm hai mujh ko

isī ḳhātir to maiñ minnat-kash-e-sāhil nahīñ hotā

hamārī hī ḳhatā.eñ rāsta hamvār kartī haiñ

‘azāb-e-āsmānī be-sabab nāzil nahīñ hotā

badal dī tū ne ḳhū apnī chalo ye maan lete haiñ

tire vā'de pe kyuuñ lekin yaqīñ kāmil nahīñ hotā

maiñ us kī kaj-adā.ī ko nazar-andāz kartā huuñ

maiñ apne farz se yaaro kabhī ġhāfil nahīñ hotā

na jaane kaun sī manzil pe aa pohñchā huuñ maiñ 'māhir'

ġhazal keh kar bhī ab mujh ko sukūñ hāsil nahīñ hotā

mera afsana-e-gham zikr ke qabil nahin hota

taghaful aap ka is mein agar shamil nahin hota

na aae ashk palkon tak ye achchha hi hua warna

chala jata bharam bhi aur kuchh hasil nahin hota

maza tufan se Takrane ka jo ma'lum hai mujh ko

isi KHatir to main minnat-kash-e-sahil nahin hota

hamari hi KHataen rasta hamwar karti hain

‘azab-e-asmani be-sabab nazil nahin hota

badal di tu ne KHu apni chalo ye man lete hain

tere wa'de pe kyun lekin yaqin kaamil nahin hota

main us ki kaj-adai ko nazar-andaz karta hun

main apne farz se yaro kabhi ghafil nahin hota

na jaane kaun si manzil pe aa pohncha hun main 'mahir'

ghazal keh kar bhi ab mujh ko sukun hasil nahin hota