naqsh mere lauTne ke sab miTane aa gae

naqsh mere lauTne ke sab miTāne aa ga.e

vo mirī kashtī kināre par Dubāne aa ga.e

sard rātoñ meñ havā.eñ jab sitam Dhāne lagīñ

aag apne āshiyāñ ko ham lagāne aa ga.e

ziist kī us kashmakash se is qadar bezār the

maut ke āġhosh meñ ḳhud ko sulāne aa ga.e

mar ga.ī ho dil meñ jab bhī hukmrānī kī havas

tāj-o-taḳht-e-zindagī ko ham luTāne aa ga.e

saañs kī jo āḳhrī daulat bachī thī dosto

'ishq kī baazī meñ us ko bhī gañvāne aa ga.e

ghuT rahā thā dam hamārā jab anā kī qaid meñ

phuul bulbul phir ġhazal ham ko sunāne aa ga.e

ro rahe haiñ haal par 'az.har' hamāre sab ke sab

ham jo apne haath se maqtal sajāne aa ga.e

naqsh mere lauTne ke sab miTane aa gae

wo meri kashti kinare par Dubane aa gae

sard raaton mein hawaen jab sitam Dhane lagin

aag apne aashiyan ko hum lagane aa gae

zist ki us kashmakash se is qadar bezar the

maut ke aaghosh mein KHud ko sulane aa gae

mar gai ho dil mein jab bhi hukmrani ki hawas

taj-o-taKHt-e-zindagi ko hum luTane aa gae

sans ki jo aaKHri daulat bachi thi dosto

'ishq ki bazi mein us ko bhi ganwane aa gae

ghuT raha tha dam hamara jab ana ki qaid mein

phul bulbul phir ghazal hum ko sunane aa gae

ro rahe hain haal par 'azhar' hamare sab ke sab

hum jo apne hath se maqtal sajaane aa gae