haalat-e-jaan pe KHudai nahin ki ja sakti

hālat-e-jāñ pe ḳhudā.ī nahīñ kī jā saktī

duur girye se udāsī nahīñ kī jā saktī

ham se dil-soḳhta logoñ ko bhī le baiThtā hai

ek ġham jis kī talāfī nahīñ kī jā saktī

mujh se dariyā ne kahā dekh ke bār-e-hijrat

burd yaañ par koī nekī nahīñ kī jā saktī

'ishq-nagrī meñ bhī rahne kā salīqa hai ki yaañ

dil se baalā koī marzī nahīñ kī jā saktī

roz kā piit milan Thiik nahīñ ki chāhat

yuuñ tire lams kī 'aadī nahīñ kī jā saktī

ek hī shaḳhs to maiñ thā tire qābil lekin

ab tire dil pe to saḳhtī nahīñ kī jā saktī

haif ye chāragarī hijr kī bābat merī

ye vo hālat hai jo achchhī nahīñ kī jā saktī

haalat-e-jaan pe KHudai nahin ki ja sakti

dur girye se udasi nahin ki ja sakti

hum se dil-soKHta logon ko bhi le baiThta hai

ek gham jis ki talafi nahin ki ja sakti

mujh se dariya ne kaha dekh ke bar-e-hijrat

burd yan par koi neki nahin ki ja sakti

'ishq-nagri mein bhi rahne ka saliqa hai ki yan

dil se baala koi marzi nahin ki ja sakti

roz ka pit milan Thik nahin ki chahat

yun tere lams ki 'adi nahin ki ja sakti

ek hi shaKHs to main tha tere qabil lekin

ab tere dil pe to saKHti nahin ki ja sakti

haif ye chaaragari hijr ki babat meri

ye wo haalat hai jo achchhi nahin ki ja sakti