dhup mein saya to barsat mein chhatri na mili

dhuup meñ saayā to barsāt meñ chhatrī na milī

ham haiñ mazdūr hameñ vaqt pe roTī na milī

mashvare sab ne diye koī sahārā na banā

nā-ḳhudā laakh mile ek bhī kashtī na milī

merā kamrā nahīñ ik paikar-e-tanhā.ī hai

tāñkte jhāñkte rahne ko bhī khiḌkī na milī

bebasī kyā hai koī pūchh le jā kar us se

jis ko pankhā to mayassar thā pe rassī na milī

tum kisī bazm meñ ho jaise ḳhusūsī mehmāñ

ham vo ahqar jise tashrīf ko kursī na milī

kaise kartā maiñ vahāñ dard kā shikva 'kāshif'

jahāñ riste hue zaḳhmoñ ko bhī paTTī na milī

dhup mein saya to barsat mein chhatri na mili

hum hain mazdur hamein waqt pe roTi na mili

mashware sab ne diye koi sahaara na bana

na-KHuda lakh mile ek bhi kashti na mili

mera kamra nahin ek paikar-e-tanhai hai

tankte jhankte rahne ko bhi khiDki na mili

bebasi kya hai koi puchh le ja kar us se

jis ko pankha to mayassar tha pe rassi na mili

tum kisi bazm mein ho jaise KHususi mehman

hum wo ahqar jise tashrif ko kursi na mili

kaise karta main wahan dard ka shikwa 'kashif'

jahan riste hue zaKHmon ko bhi paTTi na mili