bhala jaan kar kaun ranjur hoga

bhalā jaan kar kaun ranjūr hogā

muqaddar se jab tak na majbūr hogā

kisī se vafā ab bhī kī hai kisī ne

kabhī agle vaqtoñ meñ dastūr hogā

tumhārī ḳhushī par hai milnā na milnā

gavārā karoge to manzūr hogā

sunūñ kyā tumhārī ki maiñ jāntā huuñ

vahī bazm-e-dushman kā mazkūr hogā

mujhe maar Daalā ye keh kar kisī ne

jo kuchh tum kahoge vo manzūr hogā

tujhe kyā batā.ūñ ki tū kyā hai zālim

ki ye sun ke tū aur maġhrūr hogā

jo ham chāhte haiñ vo hogā yaqīnan

ba-sharte-ki tum ko bhī manzūr hogā

shikāyat ke shikvoñ kī had bhī hai āḳhir

ye ġham aap ke dil se kab duur hogā

ye kyā pūchhte ho mujhe kyuuñ diyā dil

samajh lo ki ik shaḳhs majbūr hogā

raqīboñ kī tāqat thī ham se ulajhte

tujhe ḳhud hī zālim ye manzūr hogā

yahāñ to muqaddar ko rote hī guzrī

jo masrūr hogā vo masrūr hogā

kahā maiñ ne hogā sitam yuuñ hī mujh par

to kahne lage haañ ba-dastūr hogā

chhupāo 'qamar' laakh rāz-e-mohabbat

magar dekh lenā ye mash.hūr hogā

bhala jaan kar kaun ranjur hoga

muqaddar se jab tak na majbur hoga

kisi se wafa ab bhi ki hai kisi ne

kabhi agle waqton mein dastur hoga

tumhaari KHushi par hai milna na milna

gawara karoge to manzur hoga

sunun kya tumhaari ki main jaanta hun

wahi bazm-e-dushman ka mazkur hoga

mujhe mar Dala ye keh kar kisi ne

jo kuchh tum kahoge wo manzur hoga

tujhe kya bataun ki tu kya hai zalim

ki ye sun ke tu aur maghrur hoga

jo hum chahte hain wo hoga yaqinan

ba-sharte-ki tum ko bhi manzur hoga

shikayat ke shikwon ki had bhi hai aaKHir

ye gham aap ke dil se kab dur hoga

ye kya puchhte ho mujhe kyun diya dil

samajh lo ki ek shaKHs majbur hoga

raqibon ki taqat thi hum se ulajhte

tujhe KHud hi zalim ye manzur hoga

yahan to muqaddar ko rote hi guzri

jo masrur hoga wo masrur hoga

kaha main ne hoga sitam yun hi mujh par

to kahne lage han ba-dastur hoga

chhupao 'qamar' lakh raaz-e-mohabbat

magar dekh lena ye mashhur hoga