basti mein hai wo sannaTa jangal mat lage

bastī meñ hai vo sannāTā jañgal maat lage

shaam Dhale bhī ghar pahuñchūñ to aadhī raat lage

muTThī band kiye baiThā huuñ koī dekh na le

chāñd pakaḌne ghar se niklā jugnū haat lage

tum se bichhḌe dil ko ujḌe barsoñ biit ga.e

āñkhoñ kā ye haal hai ab tak kal kī baat lage

tum ne itne tiir chalā.e sab ḳhāmosh rahe

ham taḌpe to duniyā bhar ke ilzāmāt lage

ḳhat meñ dil kī bāteñ likhnā achchhī baat nahīñ

ghar meñ itne log haiñ jaane kis ke haat lage

sāvan ek mahīne 'qaisar' aañsū jīvan bhar

in āñkhoñ ke aage bādal be-auqāt lage

basti mein hai wo sannaTa jangal mat lage

sham Dhale bhi ghar pahunchun to aadhi raat lage

muTThi band kiye baiTha hun koi dekh na le

chand pakaDne ghar se nikla jugnu hat lage

tum se bichhDe dil ko ujDe barson bit gae

aankhon ka ye haal hai ab tak kal ki baat lage

tum ne itne tir chalae sab KHamosh rahe

hum taDpe to duniya bhar ke ilzamat lage

KHat mein dil ki baaten likhna achchhi baat nahin

ghar mein itne log hain jaane kis ke hat lage

sawan ek mahine 'qaisar' aansu jiwan bhar

in aankhon ke aage baadal be-auqat lage