barson purana dost mila jaise ghair ho

barsoñ purānā dost milā jaise ġhair ho

dekhā rukā jhijhak ke kahā tum 'umair' ho

milte haiñ mushkiloñ se yahāñ ham-ḳhayāl log

tere tamām chāhne vāloñ kī ḳhair ho

kamre meñ cigarettoñ kā dhuāñ aur tirī mahak

jaise shadīd dhund meñ bāġhoñ kī sair ho

ik hādisa ho aur achānak uThā.e jaa.eñ

jab bhī ho iḳhtitām hamārā ba-ḳhair ho

ham mutma.in bahut haiñ agar ḳhush nahīñ bhī haiñ

tum ḳhush ho kyā huā jo hamāre baġhair ho

pairoñ meñ us ke sar ko dhareñ iltijā kareñ

ik iltijā ki jiskā na sar ho na pair ho

kuchh to ho darmiyān bichhaḌne ke baa'd bhī

kuchh bhī bhale qalaq ho shikāyat ho bair ho

barson purana dost mila jaise ghair ho

dekha ruka jhijhak ke kaha tum 'umair' ho

milte hain mushkilon se yahan ham-KHayal log

tere tamam chahne walon ki KHair ho

kamre mein cigaretton ka dhuan aur teri mahak

jaise shadid dhund mein baghon ki sair ho

ek hadisa ho aur achanak uThae jaen

jab bhi ho iKHtitam hamara ba-KHair ho

hum mutmain bahut hain agar KHush nahin bhi hain

tum KHush ho kya hua jo hamare baghair ho

pairon mein us ke sar ko dharen iltija karen

ek iltija ki jiska na sar ho na pair ho

kuchh to ho darmiyan bichhaDne ke ba'd bhi

kuchh bhi bhale qalaq ho shikayat ho bair ho