husn-pari ho sath aur be-mausam ki barish ho jae

husn-parī ho saath aur be-mausam kī bārish ho jaa.e

chhatrī kaun ḳharīdegā phir jitnī bārish ho jaa.e

aisī pyaas kī shiddat hai ki maiñ ye duā.eñ kartā huuñ

jitne samundar haiñ duniyā meñ sab kī bārish ho jaa.e

merī ġhazleñ us ke saath bitā.e vaqt kā hāsil haiñ

vaisī fasleñ ug aatī haiñ jaisī bārish ho jaa.e

chhoTe chhoTe tālāboñ se paanī chhīnā jaatā hai

tum to bas ye kah dete ho thoḌī bārish ho jaa.e

āñdhī aa.e bijlī kaḌke kaalī ghaTā.eñ chhāne lageñ

majbūran vo ruke mire ghar itnī bārish ho jaa.e

tañg aayā huuñ maiñ is hijr-o-vasl kī būñdā-bāndī se

yā to sūkhā paḌ jaa.e yā Dhañg kī bārish ho jaa.e

husn-pari ho sath aur be-mausam ki barish ho jae

chhatri kaun KHaridega phir jitni barish ho jae

aisi pyas ki shiddat hai ki main ye duaen karta hun

jitne samundar hain duniya mein sab ki barish ho jae

meri ghazlen us ke sath bitae waqt ka hasil hain

waisi faslen ug aati hain jaisi barish ho jae

chhoTe chhoTe talabon se pani chhina jata hai

tum to bas ye kah dete ho thoDi barish ho jae

aandhi aae bijli kaDke kali ghaTaen chhane lagen

majburan wo ruke mere ghar itni barish ho jae

tang aaya hun main is hijr-o-wasl ki bunda-bandi se

ya to sukha paD jae ya Dhang ki barish ho jae