chha gaya sar pe mere gard ka dhundla baadal

chhā gayā sar pe mire gard kā dhuñdlā bādal

ab ke sāvan bhī gayā mujh pe na barsā bādal

siip bujhte hue sūraj kī taraf dekhte haiñ

kaisī barsāt mirī jaan kahāñ kā bādal

vo bhī din the ki Tapaktā thā chhatoñ se pahroñ

ab ke pal bhar bhī muñDeroñ pe na Thahrā bādal

farsh par gir ke bikhartā rahā paare kī tarah

sabz bāġhoñ meñ mire ba.ad na jhūlā bādal

laakh chāhā na milī pyaar kī pyāsī āġhosh

ghar kī dīvār se sar phoḌ ke royā bādal

aaj kī shab bhī jahannam meñ sulagte hī kaTī

aaj kī shab bhī to botal se na chhalkā bādal

chha gaya sar pe mere gard ka dhundla baadal

ab ke sawan bhi gaya mujh pe na barsa baadal

sip bujhte hue suraj ki taraf dekhte hain

kaisi barsat meri jaan kahan ka baadal

wo bhi din the ki Tapakta tha chhaton se pahron

ab ke pal bhar bhi munDeron pe na Thahra baadal

farsh par gir ke bikharta raha pare ki tarah

sabz baghon mein mere baad na jhula baadal

lakh chaha na mili pyar ki pyasi aaghosh

ghar ki diwar se sar phoD ke roya baadal

aaj ki shab bhi jahannam mein sulagte hi kaTi

aaj ki shab bhi to botal se na chhalka baadal