bane ye zahr hi wajh-e-shifa jo tu chahe

bane ye zahr hī vaj.h-e-shifā jo tū chāhe

ḳharīd luuñ maiñ ye naqlī davā jo tū chāhe

ye zard pañkhḌiyāñ jin par ki harf harf huuñ maiñ

havā-e-shām meñ mahkeñ zarā jo tū chāhe

tujhe to ilm hai kyuuñ maiñ ne is tarah chāhā

jo tū ne yuuñ nahīñ chāhā to kyā jo tū chāhe

jab ek saañs ghuse saath ek note pise

nizām-e-zar kī hasīñ āsiyā jo tū chāhe

bas ik tirī hī shikam-ser ruuh hai āzād

ab ai asīr-e-kamand-e-havā jo tū chāhe

zarā shikoh-e-do-ālam ke gumbadoñ meñ laraz

phir us ke ba.ad terā faisla jo tū chāhe

salām un pe tah-e-teġh bhī jinhoñ ne kahā

jo terā hukm jo terī razā jo tū chāhe

jo tere baaġh meñ mazdūriyāñ kareñ 'amjad'

khileñ vo phuul bhī ik martaba jo tū chāhe

bane ye zahr hi wajh-e-shifa jo tu chahe

KHarid lun main ye naqli dawa jo tu chahe

ye zard pankhDiyan jin par ki harf harf hun main

hawa-e-sham mein mahken zara jo tu chahe

tujhe to ilm hai kyun main ne is tarah chaha

jo tu ne yun nahin chaha to kya jo tu chahe

jab ek sans ghuse sath ek note pise

nizam-e-zar ki hasin aasiya jo tu chahe

bas ek teri hi shikam-ser ruh hai aazad

ab ai asir-e-kamand-e-hawa jo tu chahe

zara shikoh-e-do-alam ke gumbadon mein laraz

phir us ke baad tera faisla jo tu chahe

salam un pe tah-e-tegh bhi jinhon ne kaha

jo tera hukm jo teri raza jo tu chahe

jo tere bagh mein mazduriyan karen 'amjad'

khilen wo phul bhi ek martaba jo tu chahe