tu hua kis ke intizar mein gum

tū huā kis ke intizār meñ gum

ek duniyā hai tere pyaar meñ gum

kis safā.ī se kar diyā kis ne

āshiyāñ hī bharī bahār meñ gum

de ga.e ham ko kār-o-bār-e-zauq

ḳhud hue zauq-e-kār-o-bār meñ gum

jo zamāne ke rāhbar the unheñ

kar diyā tū ne e'tibār meñ gum

apnī chhoḌo kaho zamāne kī

baat yuuñ kar dī iḳhtisār meñ gum

be-qarārī meñ kho ga.ī manzil

aur rahbar rahā qarār meñ gum

kal huā mai-kade meñ gum mai-kash

aaj mai-ḳhāna mai-gusār meñ gum

aaj vo log haiñ kahāñ 'vāsif'

jo hue terī rah-guzār meñ gum

tu hua kis ke intizar mein gum

ek duniya hai tere pyar mein gum

kis safai se kar diya kis ne

aashiyan hi bhari bahaar mein gum

de gae hum ko kar-o-bar-e-zauq

KHud hue zauq-e-kar-o-bar mein gum

jo zamane ke rahbar the unhen

kar diya tu ne e'tibar mein gum

apni chhoDo kaho zamane ki

baat yun kar di iKHtisar mein gum

be-qarari mein kho gai manzil

aur rahbar raha qarar mein gum

kal hua mai-kade mein gum mai-kash

aaj mai-KHana mai-gusar mein gum

aaj wo log hain kahan 'wasif'

jo hue teri rah-guzar mein gum