numayan kar diya usne bahaar-e-ru-e-KHandan ko

numāyāñ kar diyā us ne bahār-e-rū-e-ḳhandāñ ko

ki dī naġhme ko mastī rang kuchh sehn-e-gulistāñ ko

sunā hai hashr meñ shān-e-karam be-tāb niklegī

lagā rakkhā hai siine se matā'-e-zauq-e-'isyāñ ko

yahāñ kuchh naḳhl par bikhre hue aurāq-e-rangīñ haiñ

magar ik musht-e-par se pūchhiye rāz-e-gulistāñ ko

tamannā hai nikal kar sāmne bhī 'ishva farmā ho

koī detā hai jumbish parda-e-betābi-e-jāñ ko

na maiñ dīvāna huuñ 'asġhar' na mujh ko zauq-e-'uryānī

koī khīñche liye jaatā hai ḳhud jaib-o-garebāñ ko

numayan kar diya us ne bahaar-e-ru-e-KHandan ko

ki di naghme ko masti rang kuchh sehn-e-gulistan ko

suna hai hashr mein shan-e-karam be-tab niklegi

laga rakkha hai sine se mata'-e-zauq-e-'isyan ko

yahan kuchh naKHl par bikhre hue auraq-e-rangin hain

magar ek musht-e-par se puchhiye raaz-e-gulistan ko

tamanna hai nikal kar samne bhi 'ishwa farma ho

koi deta hai jumbish parda-e-betabi-e-jaan ko

na main diwana hun 'asghar' na mujh ko zauq-e-'uryani

koi khinche liye jata hai KHud jaib-o-gareban ko