jhanDe-gaDe hain bagh mein abr-e-bahaar ke

jhanDe-gaḌe haiñ baaġh meñ abr-e-bahār ke

qurbān jā.ūñ rahmat-e-parvardigār ke

gulshan meñ chand rāteñ ḳhushī kī guzār ke

abr-e-ravāñ ke saath ga.e din bahār ke

vo rang ab kahāñ chaman-e-rozgār ke

bulbul ke naġhme haiñ na tarāne hazār ke

rusvā.ī ke din aa.e kisī mai-gusār ke

aane lage salām chaman se bahār ke

betāb valvale haiñ tire intizār ke

aa ai mirī bahār din aa.e bahār ke

abr-e-siyah meñ barq-e-hasīñ lahlahā uThī

yā aa ga.e vo sāmne gesū sañvār ke

ai abr le sañbhāl ki ham haath se chale

ai tauba alvidā' ki din aa.e bahār ke

bāġhoñ pe jhuum jhuum ke bādal nahīñ uThe

gesū bikhar rahe haiñ ‘urūs-e-bahār ke

aao ki aisā vaqt na pāoge phir kabhī

aate haiñ roz roz kahāñ din bahār ke

'aḳhtar' kisī ke ghar se is andāz se chale

jaise guzār aa.e hoñ sab din bahār ke

jhanDe-gaDe hain bagh mein abr-e-bahaar ke

qurban jaun rahmat-e-parwardigar ke

gulshan mein chand raaten KHushi ki guzar ke

abr-e-rawan ke sath gae din bahaar ke

wo rang ab kahan chaman-e-rozgar ke

bulbul ke naghme hain na tarane hazar ke

ruswai ke din aae kisi mai-gusar ke

aane lage salam chaman se bahaar ke

betab walwale hain tere intizar ke

aa ai meri bahaar din aae bahaar ke

abr-e-siyah mein barq-e-hasin lahlaha uThi

ya aa gae wo samne gesu sanwar ke

ai abr le sanbhaal ki hum hath se chale

ai tauba alwida' ki din aae bahaar ke

baghon pe jhum jhum ke baadal nahin uThe

gesu bikhar rahe hain ‘urus-e-bahaar ke

aao ki aisa waqt na paoge phir kabhi

aate hain roz roz kahan din bahaar ke

'aKHtar' kisi ke ghar se is andaz se chale

jaise guzar aae hon sab din bahaar ke