jama dil par mere naqsh-e-nigar aahista aahista

jamā dil par mire naqsh-e-nigār āhista āhista

khiñchī ā.īne meñ tasvīr-e-yār āhista āhista

tumhāre rah-guzar meñ farsh haiñ 'ushshāq kī āñkheñ

qadam rakhiye zamīñ par ai nigār āhista āhista

qadam ab jam nahīñ sakte chaman meñ ai ḳhizāñ tere

vo dekh aa pohñchī gulshan meñ bahār āhista āhista

mujhe ye ḳhauf hai ai jaañ kahīñ mahshar na barpā ho

qadam rakhiye zamīñ par ai nigār āhista āhista

asar jazb-e-mohabbat ne dikhāyā baa'd marne ke

chale aa.e haiñ vo sū-e-mazār āhista āhista

numū hai sabza-e-ḳhat kā shagufta haiñ gul-e-'āriz

taraqqī kar rahī hai ye bahār āhista āhista

guzar jaate haiñ ayyām-e-javānī is tarah 'mohsin'

chaman se jaise jaatī hai bahār āhista āhista

jama dil par mere naqsh-e-nigar aahista aahista

khinchi aaine mein taswir-e-yar aahista aahista

tumhaare rah-guzar mein farsh hain 'ushshaq ki aankhen

qadam rakhiye zamin par ai nigar aahista aahista

qadam ab jam nahin sakte chaman mein ai KHizan tere

wo dekh aa pohnchi gulshan mein bahaar aahista aahista

mujhe ye KHauf hai ai jaan kahin mahshar na barpa ho

qadam rakhiye zamin par ai nigar aahista aahista

asar jazb-e-mohabbat ne dikhaya ba'd marne ke

chale aae hain wo su-e-mazar aahista aahista

numu hai sabza-e-KHat ka shagufta hain gul-e-'ariz

taraqqi kar rahi hai ye bahaar aahista aahista

guzar jate hain ayyam-e-jawani is tarah 'mohsin'

chaman se jaise jati hai bahaar aahista aahista