hamari maut ka wahid hai ye gawah badan

hamārī maut kā vāhid hai ye gavāh badan

nahīñ hai ruuh pe koī bhī zaḳhm-gāh badan

hamārī aañkh se zāhir ho raushnī kaise

hamāre sāmne rakkhā gayā siyāh badan

jo gūñge logoñ kī bastī meñ koī naam liyā

sunā.ī dene lage mujh ko be-panāh badan

hamārī ruuh pe nashtar chubhe udāsī ke

hazār aahoñ pe mātam-kada hai aah badan

use mare hue ghanTe guzar ga.e kitne

ab aage kyā hai nahīñ hai agar tabāh badan

maiñ us pe naqsh banā.ūñgī apnī vahshat ke

na.ī nikālūñgī tujh se maiñ koī raah badan

maiñ andhe logoñ meñ shāmil huuñ un ke jaisī huuñ

so ek shart hī rakkhī ga.ī nibāh badan

hamari maut ka wahid hai ye gawah badan

nahin hai ruh pe koi bhi zaKHm-gah badan

hamari aankh se zahir ho raushni kaise

hamare samne rakkha gaya siyah badan

jo gunge logon ki basti mein koi nam liya

sunai dene lage mujh ko be-panah badan

hamari ruh pe nashtar chubhe udasi ke

hazar aahon pe matam-kada hai aah badan

use mare hue ghanTe guzar gae kitne

ab aage kya hai nahin hai agar tabah badan

main us pe naqsh banaungi apni wahshat ke

nai nikalungi tujh se main koi rah badan

main andhe logon mein shamil hun un ke jaisi hun

so ek shart hi rakkhi gai nibah badan