baham jo husn o ishq mein yarana ho gaya

bāham jo husn o ishq meñ yārāna ho gayā

koī parī banā koī dīvāna ho gayā

itnī sī baat par ki huī sham.a be-hijāb

tayyār jaan dene ko parvāna ho gayā

tañg aa gayā huuñ vusat-e-mafhūm-e-ishq se

niklā jo harf muñh se vo afsāna ho gayā

har dil meñ yaad ban ke chhupe haiñ butān-e-ishq

allāh terā ghar bhī sanam-ḳhāna ho gayā

fāriġh takallufāt se haiñ rind-e-be-riyā

chullū hī un ke vāste paimāna ho gayā

tafsīl apne jaur-o-sitam kī na pūchhiye

kyā kyā na aap ne kiyā kyā kyā na ho gayā

dekhī hai jab se aañkh kisī kī phirī huī

aalam mirī nigāh meñ begāna ho gayā

ḳhush huuñ ki ho rahā hai ye irshād le ke dil

'ahsan' qubūl terā ye nazrāna ho gayā

baham jo husn o ishq mein yarana ho gaya

koi pari bana koi diwana ho gaya

itni si baat par ki hui shama be-hijab

tayyar jaan dene ko parwana ho gaya

tang aa gaya hun wusat-e-mafhum-e-ishq se

nikla jo harf munh se wo afsana ho gaya

har dil mein yaad ban ke chhupe hain butan-e-ishq

allah tera ghar bhi sanam-KHana ho gaya

farigh takallufat se hain rind-e-be-riya

chullu hi un ke waste paimana ho gaya

tafsil apne jaur-o-sitam ki na puchhiye

kya kya na aap ne kiya kya kya na ho gaya

dekhi hai jab se aankh kisi ki phiri hui

aalam meri nigah mein begana ho gaya

KHush hun ki ho raha hai ye irshad le ke dil

'ahsan' qubul tera ye nazrana ho gaya