gila yahi hai faqat apni dastan se mujhe

gila yahī hai faqat apnī dāstāñ se mujhe

vo Tok dete haiñ har baar darmiyāñ se mujhe

ye aur baat ki sail-e-ravāñ meñ maiñ bhī huuñ

pukārtā hai vo girte hue makāñ se mujhe

maiñ sochtā huuñ ye āvāz bhī mirī to nahīñ

sadā.eñ detā hai ik shaḳhs kārvāñ se mujhe

kiyā sulūk jo dushman se bhī nahīñ karte

burā bhalā na kahā aap ne zabāñ se mujhe

girāñ bahut huuñ maiñ be-mā.egī hazār sahī

ḳharīd laa.e ho tum kaun sī dukāñ se mujhe

vujūd jis kā nahīñ us kā ġham baḌī shai hai

sukūñ milā hai bahut ranj-e-rā.egāñ se mujhe

na chhoḌtā huuñ safīnā na chhoḌ saktā huuñ

havā ne bāñdh diyā jaise bādbāñ se mujhe

bulā rahā hai mujhe baar baar usī kī taraf

ḳhudā ne pheñk diyā thā jis āsmāñ se mujhe

ye aur baat ki ab ḳhud bhī ik ḳharāba hai

vo dil ke ḳhauf dilātā rahā ḳhizāñ se mujhe

gila yahi hai faqat apni dastan se mujhe

wo Tok dete hain har bar darmiyan se mujhe

ye aur baat ki sail-e-rawan mein main bhi hun

pukarta hai wo girte hue makan se mujhe

main sochta hun ye aawaz bhi meri to nahin

sadaen deta hai ek shaKHs karwan se mujhe

kiya suluk jo dushman se bhi nahin karte

bura bhala na kaha aap ne zaban se mujhe

giran bahut hun main be-maegi hazar sahi

KHarid lae ho tum kaun si dukan se mujhe

wujud jis ka nahin us ka gham baDi shai hai

sukun mila hai bahut ranj-e-raegan se mujhe

na chhoDta hun safina na chhoD sakta hun

hawa ne bandh diya jaise baadban se mujhe

bula raha hai mujhe bar bar usi ki taraf

KHuda ne phenk diya tha jis aasman se mujhe

ye aur baat ki ab KHud bhi ek KHaraba hai

wo dil ke KHauf dilata raha KHizan se mujhe