ashk-bari na miTi sina-figari na gai

ashk-bārī na miTī sīna-figārī na ga.ī

lāla-kārī kisī sūrat bhī hamārī na ga.ī

kūcha-e-husn chhuTā to hue rusvā-e-sharāb

apnī qismat meñ jo likkhī thī vo ḳhvārī na ga.ī

un kī mastāna nigāhoñ kā nahīñ koī qusūr

nāseho zindagī ḳhud ham se sañvārī na ga.ī

chashm-e-mahzūñ pe na lahrā.ī vo zulf-e-shādāb

ye parī ham se bhī shīshe meñ utārī na ga.ī

muddateñ ho ga.iiñ bichhḌe hue tum se lekin

aaj tak dil se mire yaad tumhārī na ga.ī

shaad o ḳhandāñ rahe ham yuuñ to jahāñ meñ lekin

apnī fitrat se kabhī dard-shi.ārī na ga.ī

saikḌoñ baar mire sāmne kī tauba magar

tauba 'aḳhtar' ki tirī bāda-gusārī na ga.ī

ashk-bari na miTi sina-figari na gai

lala-kari kisi surat bhi hamari na gai

kucha-e-husn chhuTa to hue ruswa-e-sharab

apni qismat mein jo likkhi thi wo KHwari na gai

un ki mastana nigahon ka nahin koi qusur

naseho zindagi KHud hum se sanwari na gai

chashm-e-mahzun pe na lahrai wo zulf-e-shadab

ye pari hum se bhi shishe mein utari na gai

muddaten ho gain bichhDe hue tum se lekin

aaj tak dil se mere yaad tumhaari na gai

shad o KHandan rahe hum yun to jahan mein lekin

apni fitrat se kabhi dard-shiari na gai

saikDon bar mere samne ki tauba magar

tauba 'aKHtar' ki teri baada-gusari na gai