rahin-e-yas yahan dil nahin ki jaan tujhse

rahīn-e-yās yahāñ dil nahīñ ki jaañ tujh se

vo 'ājizī hai ki jaatā nahīñ gumāñ tujh se

'ajab jihat-ba-jihat guuñj uThā hai sannāTā

nafas nafas hai zamāna fuġhāñ-fuġhāñ tujh se

umiid tujh se kisī taur TūTtī hī nahīñ

shikasta-dil na hue dil-shikastagāñ tujh se

kise firāq kī lazzat huī hai arzānī

bhulā ke aur huā rabt-e-be-karāñ tujh se

is inhirāf kī taujīh kuchh to kar āḳhir

niyāz-mand tire aur sargirāñ tujh se

kaheñ na kuchh to sukūt-e-suḳhan bhī rusvā.ī

chale to baat Thahartī hai dāstāñ tujh se

mizāj-e-'ishq talavvun se āshnā hī nahīñ

ḳhizāñ bahār bahāreñ rahī ḳhizāñ tujh se

musāfiroñ ko bhī kuchh sharmsār-e-nisbat kar

qayām tujh se safar tujh se kārvāñ tujh se

qaaf

sitāra-gīr suḳhan-dar-suḳhan hai fikr tirī

'ulū-e-fan meñ 'ibārat hai āsmāñ tujh se

tire qalam ne hunar ko zuhūr-e-nau baḳhshā

nikāt-e-nutq meñ shā.ista-e-bayāñ tujh se

zamīn-e-ġhālib-e-gardūñ-maqām hai 'gauhar'

ġhazal-talab haiñ mah-o-mehr-o-kahkashāñ tujh se

rahin-e-yas yahan dil nahin ki jaan tujh se

wo 'ajizi hai ki jata nahin guman tujh se

'ajab jihat-ba-jihat gunj uTha hai sannaTa

nafas nafas hai zamana fughan-fughan tujh se

umid tujh se kisi taur TuTti hi nahin

shikasta-dil na hue dil-shikastagan tujh se

kise firaq ki lazzat hui hai arzani

bhula ke aur hua rabt-e-be-karan tujh se

is inhiraf ki taujih kuchh to kar aaKHir

niyaz-mand tere aur sargiran tujh se

kahen na kuchh to sukut-e-suKHan bhi ruswai

chale to baat Thaharti hai dastan tujh se

mizaj-e-'ishq talawwun se aashna hi nahin

KHizan bahaar bahaaren rahi KHizan tujh se

musafiron ko bhi kuchh sharmsar-e-nisbat kar

qayam tujh se safar tujh se karwan tujh se

qaf

sitara-gir suKHan-dar-suKHan hai fikr teri

'ulu-e-fan mein 'ibarat hai aasman tujh se

tere qalam ne hunar ko zuhur-e-nau baKHsha

nikat-e-nutq mein shaista-e-bayan tujh se

zamin-e-ghaalib-e-gardun-maqam hai 'gauhar'

ghazal-talab hain mah-o-mehr-o-kahkashan tujh se