jab bhi neze ki ani chhuta tha ye sar baba

jab bhī neze kī anī chhūtā thā ye sar baabā

'arsh-e-lāhūt pe hilte the koī par baabā

ḳhaak kī nazr hue ḳhuun kā maqsūd hue

tere māhtāb mire sarv-o-sanobar baabā

maiñ ne talvār chalā.ī to umaD aayā thā

kul 'anāsir ke rag-o-pai meñ vahī Dar baabā

mohlateñ aur 'atā karnī thiiñ shar-zādoñ ko

yā'nī angusht se karne the firotar baabā

maiñ ne jo phuul rah-e-'ishq meñ tamhīd kiye

ek se ek the ḳhush-rang-o-mo'attar baabā

asp kī Taap to sāhil kī hī mahmez pe thī

aage paanī kā bhī hotā hai muqaddar baabā

koī sajda thā jo tajsīm huā chāhtā thā

maiñ ne retī pe kiyā us ko mukarrar baabā

jab bhi neze ki ani chhuta tha ye sar baba

'arsh-e-lahut pe hilte the koi par baba

KHak ki nazr hue KHun ka maqsud hue

tere mahtab mere sarw-o-sanobar baba

main ne talwar chalai to umaD aaya tha

kul 'anasir ke rag-o-pai mein wahi Dar baba

mohlaten aur 'ata karni thin shar-zadon ko

ya'ni angusht se karne the firotar baba

main ne jo phul rah-e-'ishq mein tamhid kiye

ek se ek the KHush-rang-o-mo'attar baba

asp ki Tap to sahil ki hi mahmez pe thi

aage pani ka bhi hota hai muqaddar baba

koi sajda tha jo tajsim hua chahta tha

main ne reti pe kiya us ko mukarrar baba