aashiqi ka haal sahab aur behtar ho gaya

'āshiqī kā haal sāhab aur behtar ho gayā

jaam āñkhoñ se piyā to āb-e-kausar ho gayā

bārish-e-nazr-e-karam un kī na muddat se huī

pyaas kī shiddat se āḳhir dil hī banjar ho gayā

marham-e-zaḳhm-e-jigar ban kar vo aa.e the magar

dard kā tevar kaḌā kuchh aur baḌh kar ho gayā

phir ga.ī us ke ta'alluq se 'aqīdat kī nigāh

devtā merī nazar meñ thā vo patthar ho gayā

ek bādal āsmāñ kī Thokareñ khātā rahā

jab zamīñ kī god meñ aayā samundar ho gayā

phuul sī narmī rahī lahje meñ tab tak barqarār

qatl rishte kā huā jab lafz ḳhanjar ho gayā

pattharoñ ke biich 'rūbī' hai kaThin chalnā magar

jo chalā is raah par vo shaḳhs rahbar ho gayā

'ashiqi ka haal sahab aur behtar ho gaya

jam aankhon se piya to aab-e-kausar ho gaya

barish-e-nazr-e-karam un ki na muddat se hui

pyas ki shiddat se aaKHir dil hi banjar ho gaya

marham-e-zaKHm-e-jigar ban kar wo aae the magar

dard ka tewar kaDa kuchh aur baDh kar ho gaya

phir gai us ke ta'alluq se 'aqidat ki nigah

dewta meri nazar mein tha wo patthar ho gaya

ek baadal aasman ki Thokaren khata raha

jab zamin ki god mein aaya samundar ho gaya

phul si narmi rahi lahje mein tab tak barqarar

qatl rishte ka hua jab lafz KHanjar ho gaya

pattharon ke bich 'rubi' hai kaThin chalna magar

jo chala is rah par wo shaKHs rahbar ho gaya