apni to koi baat banae nahin bani

apnī to koī baat banā.e nahīñ banī

kuchh ham na kah sake to kuchh us ne nahīñ sunī

yuuñ to chahār samt hai apne hisār-e-shab

ham tīrgī ko chhed ke laate haiñ raushnī

nādīda manzaroñ se tarāshe haiñ ḳhvāb zaar

kab dar-ḳhur-e-nigah koī manzar hai dīdanī

ochhā thā vaar us kā magar ham na bach sake

kis zahr meñ bujhā.ī thī us shaḳhs ne anī

har-dil-azīz vo bhī hai ham bhī haiñ ḳhush-mizāj

ab kyā batā.eñ kaise hamārī nahīñ banī

auroñ kī tarah ham bhī magar jhel jā.eñge

sab zindagī samajhte haiñ jis ko vo jāñ-kanī

'bilqīs' apnī baat to sab se alag rahī

nā-guftanī sunī hai kahī nā-shunīdanī

apni to koi baat banae nahin bani

kuchh hum na kah sake to kuchh us ne nahin suni

yun to chahaar samt hai apne hisar-e-shab

hum tirgi ko chhed ke late hain raushni

nadida manzaron se tarashe hain KHwab zar

kab dar-KHur-e-nigah koi manzar hai didani

ochha tha war us ka magar hum na bach sake

kis zahr mein bujhai thi us shaKHs ne ani

har-dil-aziz wo bhi hai hum bhi hain KHush-mizaj

ab kya bataen kaise hamari nahin bani

auron ki tarah hum bhi magar jhel jaenge

sab zindagi samajhte hain jis ko wo jaan-kani

'bilqis' apni baat to sab se alag rahi

na-guftani suni hai kahi na-shunidani