use har ruKH se toDa ja raha hai

use har ruḳh se toḌā jā rahā hai

magar ā.īna hañstā jā rahā hai

ham apne aap meñ sūraj haiñ phir bhī

añdherā ham meñ DhūñDā jā rahā hai

use ham ne zarā sā bhar diyā kyā

ye sāġhar to chhalaktā jā rahā hai

tire chehre meñ aisā kyā hai āḳhir

jise barsoñ se dekhā jā rahā hai

jahāñ tak mujh se matlab hai jahāñ ko

vahīñ tak mujh ko pūchhā jā rahā hai

zamāne par bharosa karne vaalo

bharose kā zamāna jā rahā hai

najābat jis ko chhū kar bhī na guzrī

use sayyad batāyā jā rahā hai

use har ruKH se toDa ja raha hai

magar aaina hansta ja raha hai

hum apne aap mein suraj hain phir bhi

andhera hum mein DhunDa ja raha hai

use hum ne zara sa bhar diya kya

ye saghar to chhalakta ja raha hai

tere chehre mein aisa kya hai aaKHir

jise barson se dekha ja raha hai

jahan tak mujh se matlab hai jahan ko

wahin tak mujh ko puchha ja raha hai

zamane par bharosa karne walo

bharose ka zamana ja raha hai

najabat jis ko chhu kar bhi na guzri

use sayyad bataya ja raha hai