chahte ho ki andheron ka yahan dam na rahe

chāhte ho ki añdheroñ kā yahāñ dam na rahe

sham' phir aisī jalāo ki ziyā kam na rahe

yaad ā.eñgī bahut tum ko hamārī bāteñ

dosto darmiyāñ ik roz agar ham na rahe

aur kuchh ham ko zamāne se milā yā na milā

dostoñ ke magar ikrām kabhī kam na rahe

aisā māhaul banāo ai mire ham-nafaso

ġham kisī dil meñ kisī aañkh meñ shabnam na rahe

us meñ rangat na latāfat na mahak pāoge

'āriz-e-gul pe agar qatra-e-shabnam na rahe

sub.h-e-nau kā na tajassus kabhī hogā ai 'nūr'

zindagī meñ agar insāñ kī shab-e-ġham na rahe

chahte ho ki andheron ka yahan dam na rahe

sham' phir aisi jalao ki ziya kam na rahe

yaad aaengi bahut tum ko hamari baaten

dosto darmiyan ek roz agar hum na rahe

aur kuchh hum ko zamane se mila ya na mila

doston ke magar ikram kabhi kam na rahe

aisa mahaul banao ai mere ham-nafaso

gham kisi dil mein kisi aankh mein shabnam na rahe

us mein rangat na latafat na mahak paoge

'ariz-e-gul pe agar qatra-e-shabnam na rahe

subh-e-nau ka na tajassus kabhi hoga ai 'nur'

zindagi mein agar insan ki shab-e-gham na rahe