mohabbaton mein dil-o-jaan nisar mat karna

mohabbatoñ meñ dil-o-jāñ nisār mat karnā

kisī se 'ishq kabhī be-shumār mat karnā

maiñ lauT ā.ūñgā ye e'tibār mat karnā

safar safar hai mirā intizār mat karnā

bhañvar meñ tairnā aatā nahīñ hai gar tum ko

mohabbatoñ ke samundar ko paar mat karnā

khulī havā meñ huī merī parvarish ai dost

kisī tarah se bhī merā hisār mat karnā

naqāb ruḳh se ulaT kar ai dil-rubā merī

nigāh-e-shauq se merā shikār mat karnā

'azīm' zaḳhm diye the jo ho ga.e nāsūr

jigar ko mere abhī tum figār mat karnā

mohabbaton mein dil-o-jaan nisar mat karna

kisi se 'ishq kabhi be-shumar mat karna

main lauT aaunga ye e'tibar mat karna

safar safar hai mera intizar mat karna

bhanwar mein tairna aata nahin hai gar tum ko

mohabbaton ke samundar ko par mat karna

khuli hawa mein hui meri parwarish ai dost

kisi tarah se bhi mera hisar mat karna

naqab ruKH se ulaT kar ai dil-ruba meri

nigah-e-shauq se mera shikar mat karna

'azim' zaKHm diye the jo ho gae nasur

jigar ko mere abhi tum figar mat karna