aish-e-ummid hi se KHatra hai

aish-e-ummīd hī se ḳhatra hai

dil ko ab dil-dahī se ḳhatra hai

hai kuchh aisā ki us kī jalvat meñ

hameñ apnī kamī se ḳhatra hai

jis ke āġhosh kā huuñ dīvāna

us ke āġhosh hī se ḳhatra hai

yaad kī dhuup to hai roz kī baat

haañ mujhe chāñdnī se ḳhatra hai

hai ajab kuchh muāmla darpesh

aql ko āgahī se ḳhatra hai

shahr-e-ġhaddār jaan le ki tujhe

ek amrohvī se ḳhatra hai

hai ajab taur hālat-e-girya

ki mizha ko namī se ḳhatra hai

haal ḳhush lakhna.ū kā dillī kā

bas unheñ 'mus.hafī' se ḳhatra hai

āsmānoñ meñ hai ḳhudā tanhā

aur har aadmī se ḳhatra hai

maiñ kahūñ kis tarah ye baat us se

tujh ko jānam mujhī se ḳhatra hai

aaj bhī ai kanār-e-bān mujhe

terī ik sāñvlī se ḳhatra hai

un laboñ kā lahū na pī jā.ūñ

apnī tishna-labī se ḳhatra hai

'jaun' hī to hai 'jaun' ke darpai

'mīr' ko 'mīr' hī se ḳhatra hai

ab nahīñ koī baat ḳhatre kī

ab sabhī ko sabhī se ḳhatra hai

aish-e-ummid hi se KHatra hai

dil ko ab dil-dahi se KHatra hai

hai kuchh aisa ki us ki jalwat mein

hamein apni kami se KHatra hai

jis ke aaghosh ka hun diwana

us ke aaghosh hi se KHatra hai

yaad ki dhup to hai roz ki baat

han mujhe chandni se KHatra hai

hai ajab kuchh muamla darpesh

aql ko aagahi se KHatra hai

shahr-e-ghaddar jaan le ki tujhe

ek amrohwi se KHatra hai

hai ajab taur haalat-e-girya

ki mizha ko nami se KHatra hai

haal KHush lakhnau ka dilli ka

bas unhen 'mushafi' se KHatra hai

aasmanon mein hai KHuda tanha

aur har aadmi se KHatra hai

main kahun kis tarah ye baat us se

tujh ko jaanam mujhi se KHatra hai

aaj bhi ai kanar-e-ban mujhe

teri ek sanwli se KHatra hai

un labon ka lahu na pi jaun

apni tishna-labi se KHatra hai

'jaun' hi to hai 'jaun' ke darpai

'mir' ko 'mir' hi se KHatra hai

ab nahin koi baat KHatre ki

ab sabhi ko sabhi se KHatra hai