zamin ke sath bhi rahta tha rabta mera

zamīñ ke saath bhī rahtā thā rābta merā

ye aur baat ki mehvar rahā judā merā

kisī hasīn sharārat kī oT meñ ruk kar

mujhe pukārne lagtā hai bachpanā merā

maiñ bahra-var huā ḳhud-āgahī kī daulat se

ki merī samt hī rahtā thā aa.ina merā

tū mujh se bhaag ki rassī darāz hai terī

khiñchā huā hai jahānoñ pe dā.ira merā

mire 'adū zarā hushyār ho ke rok mujhe

ki terī jaañ se guzartā hai rāsta merā

bhañvar meñ chhoḌ diyā gar-che nā-ḳhudā ne 'zahīr'

na dekh pā.egā lekin vo Dūbnā merā

zamin ke sath bhi rahta tha rabta mera

ye aur baat ki mehwar raha juda mera

kisi hasin shararat ki oT mein ruk kar

mujhe pukarne lagta hai bachpana mera

main bahra-war hua KHud-agahi ki daulat se

ki meri samt hi rahta tha aaina mera

tu mujh se bhag ki rassi daraaz hai teri

khincha hua hai jahanon pe daira mera

mere 'adu zara hushyar ho ke rok mujhe

ki teri jaan se guzarta hai rasta mera

bhanwar mein chhoD diya gar-che na-KHuda ne 'zahir'

na dekh paega lekin wo Dubna mera