ret-ghaDi ko bharti hai muTThi diwanon ki

ret-ghaḌī ko bhartī hai muTThī dīvānoñ kī

ik lamhe par lag jaatī hai chhāp zamānoñ kī

jism agarche Dhāñp bhī lo to 'aks barahna hai

kis ne kahā thā sair karo ā.īna-ḳhānoñ kī

lahreñ lete sarv sunā.eñ ik jharne ke giit

raahī duur bahā le jaa.e raah gumānoñ kī

apnī zamīñ ko kab tak DhūñDe mere qalam kā hal

itne meñ to pak jaatī hai fasl kisānoñ kī

kore kāġhaz ulaT rahā hai kaun udāsī meñ

gahre bādal Taap rahe haiñ chhateñ makānoñ kī

ab ke aisā khel rachāyā hijr ke mausam ne

aatī hai ābād gharoñ se bū vīrānoñ kī

ret-ghaDi ko bharti hai muTThi diwanon ki

ek lamhe par lag jati hai chhap zamanon ki

jism agarche Dhanp bhi lo to 'aks barahna hai

kis ne kaha tha sair karo aaina-KHanon ki

lahren lete sarw sunaen ek jharne ke git

rahi dur baha le jae rah gumanon ki

apni zamin ko kab tak DhunDe mere qalam ka hal

itne mein to pak jati hai fasl kisanon ki

kore kaghaz ulaT raha hai kaun udasi mein

gahre baadal Tap rahe hain chhaten makanon ki

ab ke aisa khel rachaya hijr ke mausam ne

aati hai aabaad gharon se bu viranon ki