mujhe bhi ishq karna chahiye tha

mujhe bhī 'ishq karnā chāhiye thā

hai dariyā to utarnā chāhiye thā

kisī kā 'aks rakh kar aa.ine maiñ

kabhī sajnā sañvarnā chāhiye thā

agar milnā thā mujh ko zindagī se

to phir ik roz marnā chāhiye thā

zamāne meñ hamārā naam hotā

kabhī had se guzarnā chāhiye thā

maiñ us ke jism par hī tair paayā

mujhe dil meñ utarnā chāhiye thā

agar mujh se mohabbat hī nahīñ thī

to vā'de se mukarnā chāhiye thā

ḳhudā kā ḳhauf hai 'gulshan' zarūrī

zamāne se bhī Darnā chāhiye thā

mujhe bhi 'ishq karna chahiye tha

hai dariya to utarna chahiye tha

kisi ka 'aks rakh kar aaine main

kabhi sajna sanwarna chahiye tha

agar milna tha mujh ko zindagi se

to phir ek roz marna chahiye tha

zamane mein hamara nam hota

kabhi had se guzarna chahiye tha

main us ke jism par hi tair paya

mujhe dil mein utarna chahiye tha

agar mujh se mohabbat hi nahin thi

to wa'de se mukarna chahiye tha

KHuda ka KHauf hai 'gulshan' zaruri

zamane se bhi Darna chahiye tha