kabhi hangama-e-jaan se nikal kar KHud se milna tum

kabhī hangāma-e-jāñ se nikal kar ḳhud se milnā tum

vahāñ jo shahr bastā hai sadā bedār rahtā hai

vahāñ jazbe kisī 'unvān kī sūrat nahīñ Dhalte

vahāñ ḳhāmosh lamhoñ meñ 'ajab asrār rahtā hai

vahāñ rishte binā lafzoñ ke apnī saañs lete haiñ

vahāñ pahchān kā sūraj pas-e-kohsār rahtā hai

'ajab jaadū hai us bastī ke sannāTe kī lorī meñ

jo us 'ālam meñ so jaa.e vo phir sar-shār rahtā hai

vahāñ dastak kī hasrat hai na āvāzoñ kā mela hai

vahāñ bas ḳhāmushī kā ik 'ajab sansār rahtā hai

vahāñ saaya nahīñ miltā kisī guzre hue pal kā

vahāñ to ik nayā 'ālam pas-e-dīvār rahtā hai

vahāñ harf-o-bayāñ ke sab havāle TuuT jaate haiñ

vahāñ ḳhāmosh āñkhoñ meñ 'ajab iz.hār rahtā hai

vahāñ miTTī kī sūrat meñ koī miltā nahīñ ham ko

vahāñ ḳhud aa.ina ban kar tirā kirdār rahtā hai

kabhi hangama-e-jaan se nikal kar KHud se milna tum

wahan jo shahr basta hai sada bedar rahta hai

wahan jazbe kisi 'unwan ki surat nahin Dhalte

wahan KHamosh lamhon mein 'ajab asrar rahta hai

wahan rishte bina lafzon ke apni sans lete hain

wahan pahchan ka suraj pas-e-kohsar rahta hai

'ajab jadu hai us basti ke sannaTe ki lori mein

jo us 'alam mein so jae wo phir sar-shaar rahta hai

wahan dastak ki hasrat hai na aawazon ka mela hai

wahan bas KHamushi ka ek 'ajab sansar rahta hai

wahan saya nahin milta kisi guzre hue pal ka

wahan to ek naya 'alam pas-e-diwar rahta hai

wahan harf-o-bayan ke sab hawale TuT jate hain

wahan KHamosh aankhon mein 'ajab izhaar rahta hai

wahan miTTi ki surat mein koi milta nahin hum ko

wahan KHud aaina ban kar tera kirdar rahta hai